Geiriadura yw un o ddiddordebau pennaf D. Geraint Lewis o Langwyryfon ger Aberystwyth.  Mewn geiriau eraill, mae’n byw a bod yng nghwmni geiriau a dyna deitl ei thesawrws newydd i blant a gyhoeddir gan Wasg Gomer. Mae’r gyfrol Mewn Geiriau Eraill: Thesawrws i Blant yn ychwanegiad arbennig at y llu o lyfrau iaith defnyddiol o eiddo’r awdur toreithiog.

‘Beth am air arall yn lle neis?’ meddai’r athro wrth y disgybl. Wedi meddwl a phendroni am amser, mae’n cynnig gair.  Ond pe byddai copi o thesawrws wrth ei ochr, byddai modd iddo gynnig nifer o eiriau mewn byr amser!  Dyna rym thesawrws sy’n gyfrwng i gyfoethogi iaith.  Yn y gyfrol Mewn Geiriau Eraill cynhwysir y prif air mewn brawddeg esboniadol a nodir geiriau eraill y gellir rhoi yn ei le mewn blychau coch.  Nodir geiriau croes eu hystyr gyda chroes werdd a cheir llun chwyddwydr yn nodi ‘Edrychwch hefyd dan..’.   Os oes yna ddywediadau neu ymadroddion perthnasol i’r gair dan sylw, rhestrir rheiny hefyd.  Mae yna gyfoeth rhwng cloriau’r llyfr hwn a ddyluniwyd yn glir a hwylus.

Mae’r gyfrol Mewn Geiriau Eraill ar gyfer plant oed cynradd yn bennaf ac yn gymar perffaith i Geiriadur Cynradd Gomer. Ond gall plant o bob oed, dysgwyr ac oedolion ddysgu llawer am yr iaith Gymraeg drwy fodio tudalennau’r llyfr cynhwysfawr hwn.

Mae ein diolch yn fawr i D. Geraint Lewis,  brodor o Ynys-y-bŵl, Morgannwg, am fynd ati i ddysgu Cymraeg ei hun yn y lle cyntaf ac yna rhoi cymaint o’i amser yn ymwneud â nodweddion arbennig yr iaith.