Dyw llwyfan eisteddfod ddim yn ddieithr i Dafydd Jones, Ystrad Meurig – cerdd dant, alaw werin a mwy!  Ond i gynulleidfa ifanc, mae ei wyneb yn fwy adnabyddus fel y cymeriad Coblyn yn y gyfres deledu ‘Pentre Bach’ am Sali Mali a’i ffrindiau.  Ond Coblyn ei hun sy’n serennu yn y llyfr stori-a-llun Coblyn o Broblem!, a gyhoeddir gan Wag Gomer.

Ifana Savill, yr un gafodd y syniad cyffrous i greu Canolfan Pentre Bach ym Mlaenpennal, Ceredigion, yw awdures y stori a’r dylunydd, Gary Evans, o Giliau Aeron, fu’n creu arlunwaith y llyfr stori-a-llun lliwgar a gyhoeddir gan Wasg Gomer.  Seiliodd Gary ei ddarluniau ar y ffotograffau o’r actorion fu’n cymryd rhan yn y gyfres deledu ac nid yw’n syndod gweld gwên ddireidus ar wyneb hoffus Coblyn yn y stori.

Mae'n amser brecwast a wy wedi'i ferwi yw dewis Coblyn bob bore ers iddo fod yn goblyn bach.  Ond heddiw mae yna broblem, coblyn o broblem, does dim wy ar ôl. Yna mae’n mynd o gwmpas y pentre i holi am fenthyg wy gan alw gyda Mrs Migl Magl, Jac y Jwc, Bili Bom Bom a Shoni Bric-a-moni, ond heb fawr o lwc.  Newydd ddefnyddio ei wy olaf i wneud cacen mae Sali Mali ond allan â hi i’r ardd gefn i gyflwyno un o drigolion newydd Pentre Bach i Coblyn sef Begw’r iâr.  Yn gorwedd yn y gwellt mae’r wy mawr, brown perta erioed ac mae Coblyn wrth ei fodd.    

Dyma’r trydydd teitl yng nghyfres Pobl Pentre Bach, cyhoeddwyd Dacw’r Gwcw a Mae Popi Yma y llynedd. Mae athroniaeth y Cyfnod Sylfaen yn gefnlen i’r straeon hyn hefyd gan gynnig profiadau amrywiol i blant i brofi, chwarae, efelychu, ac ymchwilio, yn y cartref, y dosbarth a thu allan. 

Wrth i ffrindiau yr enwog Sali Mali ymuno â hi ym Mhentre Bach, gall plant Cymru gyfan ymuno â’r criw difyr wrth droi tudalennau Coblyn o Broblem! 

Manylion Cyhoeddi

Coblyn o Broblem!
Cyfres Pobl Pentre Bach
Ifana Savill a Gary Evans
Gwasg Gomer 9781848513938  
£5.99